Sarkin Musulmi Ya Ce A Duba Watan Zul-Hijjah A Yau Alhamis

Mai alfarma sarkin Musulmi a Nijeriya, Sa'ad Abubakar III, ya umarci Musulmai su duba jinjirin watan Zul-Hijjah na shekarar Hijira 1445 ...

Mai alfarma sarkin Musulmi a Nijeriya, Sa'ad Abubakar III, ya umarci Musulmai su duba jinjirin watan Zul-Hijjah na shekarar Hijira 1445 a yau Alhamis.

Shugaban kwamitin ba da shawara a kan harkokin addini, Farfesa Sambo Janaidu ya faɗa cikin wata sanarwa ya ce "muna sanar da al'ummar Musulmi cewa ranar Alhamis 6 ga watan Yuni za ta zamo daidai da 29 ga watan Zul-Qidah na shekarar 1445 AH".

Sanarwar ta ƙara da cewa “ana buƙatar Musulmai su fara duba jinjirin watan Dhul-Hijjah, su kuma kai rahoton ganin watan ga dagaci ko hakimin garinsu, domin tura saƙon ga mai alfarma sarkin Musulmi.”

Mai alfarma sarkin Musulmin ya yi addu'ar "Allah ya ci gaba da tallafa wa Musulmi wajen gudanar da harkokin ibadar su".