Varane ya taimaka wa Man United a wasan da ta doke Wolves da kyar

  Raphael Varane ya ci wa Manchester United kwallon da ta ba ta nasara a kan Wolves ana saura mintuna 14 a tashi daga  wasan da suka  gwabza...

 

Raphael Varane ya ci wa Manchester United kwallon da ta ba ta nasara a kan Wolves ana saura mintuna 14 a tashi daga  wasan da suka  gwabza a daren Litinin a gasar  Firimiyar Ingila, wasan da aka yi amannar United ta tsallake rijiya da baya.

Tawagar ta Erik ten Hag ta samar da damammaki  na cin kwallaye masu armashi amma babu nasarar  sanya  ko da guda a raga, sai bayan da Bruno Fernandes ya  saka wa Aaron Wan-Bissaka wata kwallo shi kuma ya jefa ta cikin gidan Wolves,inda a nan ne Varane ya yi amfani da tsayinsa ya sa mata kai ta shiga raga.

Wannan lamari ya yi wa Wolves ciwo ainun, ganin cewa kocinta, Gary O’Neil yana neman nasararsa ta farko a wannan kungiya da ya karbi aikin horar da ita.

O'Neil ya samu katin gargadi a lokacin da ya yi ta hargowa yana neman alkalin wasa ya ba tawagarsa bugun daga kai sai mai tsaron raga a  kusan karshen wasa.

A nasa bangaren, mai tsaron ragar United, wanda yake  wasan Firimiya a karon farko ya tsallake rijiya da baya, saboda ya yi sa’a  ba a sallame shi daga wasa ba duk da karon da ya yi da Sasa Kalajdzic ba tare da ya  taba kwallo ba.